Traktoruna uyğun aqreqatın olsun

Kənd təsərrüfatında məhsuldarlıq, vaxtın səmərəli istifadəsi və texnikanın uzunömürlülüyü üçün əsas şərtlərdən biri traktora uyğun aqreqat seçimidir. Çox zaman fermerlər və təsərrüfat sahibləri aqreqat alarkən yalnız funksiyaya və qiymətə diqqət yetirirlər. Halbuki, aqreqatın traktora uyğunluğu həm işin keyfiyyətinə, həm də texnikanın ömrünə birbaşa təsir edir. Bu bloqda traktor və aqreqat seçimi, traktorun at gücü və texnikanı qoruma yolları haqqında ətraflı məlumat verəcəyik.

Traktoruna uyğun aqreqat niyə vacibdir?

Hər bir traktorun müəyyən güc sərhədləri və texniki imkanları vardır. Məsələn, 75 at gücünə malik bir traktorla 5 gövdəli kotanı çəkmək mümkünsüzdür. Bu, nəinki texnikanı yükləyəcək, həm də aqreqatın torpağa tam nüfuz etməməsinə, işin keyfiyyətsiz olmasına və texnikanın sıradan çıxmasına səbəb olacaq.

Düzgün aqreqat seçimi traktorun mühərrik gücünə, çəkisinin balansına və ötürücü sisteminə uyğun olmalıdır. Əks halda, həm yanacaq sərfiyyatı artır, həm də traktorun aqreqatla iş zamanı yolda sürüşməsi və ya dayanmadan işləyə bilməməsi kimi hallar müşahidə olunur. Məsələn: 50 at gücündə traktorun görə biləcəyi işlər üçün 75 at gücündə traktor alanda bu, yüksək yanacaq sərfiyyatına, xərcə səbəb olacaq. Nəticədə, gəlirə mənfi təsir göstərəcək.

Düzgün aqreqat və traktorun uyğunluğu

Aqreqat və traktorun uyğunluğu yalnız ölçü baxımından deyil, funksional baxımdan da nəzərə alınmalıdır. Traktorun hidravlik sistemi, quyruq mili (PTO) və asqı sistemi aqreqatın texniki göstəricilərinə uyğun olmalıdır.

Məsələn:

100 at gücündə bir traktor üçün 3 metr eni olan diskli mala idealdır.
Eyni traktor ikisıralı kultivatorla problemsiz işləyə bilər, amma dördsıralı dərin şum aparan aqreqat onu yükləyə bilər.

Əgər aqreqat traktordan böyük və ağırdırsa, bu zaman traktorun ön hissəsi havaya qalxır, bu da təhlükəli nəticələrə gətirib çıxara bilər. Əgər aqreqat çox kiçikdirsə, traktorun imkanlarından tam istifadə olunmur və məhsuldarlıq aşağı düşür.

Traktorun at gücü və aqreqat seçimi

Traktorun at gücü, yəni mühərrikin verdiyi maksimum güc aqreqat seçimi üçün ən vacib göstəricilərdən biridir. Məsələn:

50–70 at gücündə traktorlar: kiçik təsərrüfatlar üçün nəzərdə tutulmuşdur. Bu traktorlar üçün sadə kotan, kultivator, toxumsəpən və kiçik gübrəsəpənlər idealdır.
70–100 at gücündə traktorlar: ortaölçülü təsərrüfatlar üçün uyğundur. Bu tip traktorlar diskli mala, daha iri toxumsəpən və dərmançiləyici ilə rahat işləyə bilər.
100+ at gücündə traktorlar: iri təsərrüfatlar və dərin şum, ağır kultivasiya işləri üçün nəzərdə tutulmuş aqreqatlarla işləyə bilər.

Unutmayaq ki, traktorun gücü nə qədər yüksəkdirsə, o qədər iri və ağır aqreqatları idarə edə bilir, amma bu da əlavə yanacaq sərfiyyatı və texnikaya qulluq tələb edir.

Texnikanı qoruma yolları

Texnikanın uzunömürlü və qənaətli işləməsi üçün yalnız düzgün aqreqat seçimi yetərli deyil. Texnikanı qoruma yolları aşağıdakı kimi sıralana bilər:

Aqreqatın düzgün montajı: aqreqat traktora möhkəm və düzgün şəkildə bərkidilməlidir. Əksi hallarda həm traktor, həm də aqreqat zədələnə bilər.
Dövri texniki baxış: hidravlik sistemlər, yağ səviyyəsi, hava filtrləri və aqreqatın işçi hissələri mütəmadi yoxlanmalıdır.
Uyğun iş rejimi: traktor heç vaxt öz gücündən artıq yüklə işləməməlidir. Mühərrikin aşırı qızması və güc itkisi baş verə bilər.
Saxlanma şəraiti: aqreqatlar və traktorlar yağış, qar və birbaşa günəş işığından qorunmalıdır. Uzunmüddətli istifadə edilmədikdə mühafizə örtüyü ilə örtülməlidir.

Nəticə

Sonda deyə bilərik ki, traktoruna uyğun aqreqatın olması həm məhsuldarlığı artırır, həm də texnikanın ömrünü uzadır. Fermerlər aqreqat alarkən yalnız qiymətə və marka seçimlərinə deyil, traktorun at gücü, texniki imkanları və təsərrüfatın sahəsinə görə seçim etməlidirlər. Bu yanaşma uzunmüddətli perspektivdə daha az xərc, daha yüksək keyfiyyət və daha səmərəli iş deməkdir.

Unutma, düzgün texnika seçimi uğurlu təsərrüfatın sirridir!

Təsərrüfatınıza uyğun traktoru və traktora uyğun aqreqatları “Prior”dan 40 % dövlət güzəşti və 60 ayadək FAİZSİZ lizinqlə əldə et.